好多人食鮫魚都習慣切一片片，我就鍾意起成塊魚扒，當西餐又得，普通當一個餸又得。
其實，煮西餐，唔一定牛扒，海鮮都係一個選擇，而魚扒，都唔一定要CC Super過D，一來貴，好似我圖中咁大舊魚，起到兩大塊魚柳，都係80蚊，如果CC Super，可能一塊都唔得。二來老遠運黎，Carbon Footprint唔環保，三來來路野唔一定好食過本地魚，起碼無咁新鮮。
起魚扒有一個好處，就係可以煎香塊皮，因爲如果一片片，要煎塊皮，就要用筷子豎起舊魚，仲要不斷煎唔同部位（舊魚圓家嘛），好煩。但如果成塊扒，打平就可以煎到塊皮，好香口。
鮫魚本身好鮮味，但肉質好鞋，所以我從來買魚尾，就嫩好多。傳統智慧，買餸要抵，就一定買魚心，因爲骨對肉比例低，啖啖肉，抵。但講真，今日大家生活水平都高左，鮫魚又唔係貴，唔使下下計住抵唔抵，魚尾條骨重量佔比高，但差到幾多？最緊要好食。
但係大部分屋邨師奶仍然係抱住慳得一蚊得一蚊嘅思想，所以魚枱成日賣剩魚尾，我話要由尾切上去，D阿姐不知幾開心。開心到好多時候都唔使搭頭，其實都抵返。
少少鹽、胡椒粉，醃一陣。煎魚唔怕煎透D，唔好净係求熟，熟左都繼續煎香佢，一來表面微焦（焦糖化），食落香口，二來蒸發下魚肉裏面水分，濃縮D鮮味。我習慣會落少少牛油（記得，唔好用植物牛油，唔好食又唔健康），香好多。
一家幾口，我地果兩塊就要醃。兩個囡囡（貓貓）果塊就咩都唔好落，另外煎，而且唔好太燶。
Comments