果日响街市見到D紅杉好大條，成斤以上，唔係成日見（雖然今年可能紅衫大做，都見過幾次），六個半一兩，買左條斤5兩，收我130蚊。
大條魚，我興起魚柳或者起片，無他，整色整水。
紅衫魚肉本來就好甜，係肉質唔夠結實。一般Size嘅，原條煎香真係好香口。起魚柳煎，可以做西餐，其實比去CCSuper買塊咩野冰鮮鱸魚魚柳好食好多，起碼係新鮮魚，莫講雪藏果D比目魚或者銀鱈魚。
就算西餐，都可以街市揀本地魚（雖然嚴格好多都唔係本港水域捕捉，但起碼唔係大西洋老遠搭飛機黎），性價比好好多。起魚柳，一次生兩次就熟，而且如果大條魚，都做你過百生意，好多魚檔都樂意幫你起埋。
魚柳落鹽醃下，一來落味，二來抽乾魚肉裏面水分，到煎嘅時候，就容易煎得香脆。（雖然我上次都唔夠乾身，煎得唔夠香脆，睇相都知道。）
魚頭魚骨，就可以滾湯。我果日滾冬瓜，因爲夏天，冬瓜富含鉀質，有利平衡身體多餘嘅鈉，利尿消腫。如果你堅持全西餐，可以魚湯做湯底，加忌廉，落幾隻蜆肉蝦仁，咪係海鮮忌廉湯lor。
Comments