話説果日老婆生日，我地呢D刁民，無得出街食（不過呢兩年有錢都留返移民，唔似之前生日飯例牌Lawry‘s），屋企整個西餐，少少地都叫做慶祝。
去CC Super買塊澳洲草飼牛扒，兩百幾蚊。之前講過點解要食草飼，因爲牛天然係食草，唔係食粟米，所以草飼同穀飼，即係海魚同養魚分別，平平地我都成日食養魚，但如果養魚仲貴，咁我就肯定留返比你，餐餐野生海三刀啦。
本來想忍痛試下Dry Aged果D，但去到見到要3倍價錢，即係同樣果塊牛扒，可能要7百幾8百蚊，好似又真係貴左D，所以都係唔捨得。
然後去街市買隻龍蝦，188一斤，斤幾都係兩百幾。先蒸熟，起條尾出黎，然後用牛油煎香。而家學識呢一招，先蒸/烚熟，然後再煎，之前椒鹽鮑魚都係咁整。一來容易控制熟唔熟，唔會出面燶曬入面都未熟，二來可以焦糖化表面（即係燶邊，不過扮型嘅講法），加入其他味道，例如牛油（龍蝦）或者香料（鮑魚），香口好多。
牛肉唔敢講，話曬人地Lawry’s燒牛肉出名左好多年，應該都有D料到（咁我都真係試過，真係得），但Side Dish果D龍蝦，睇死都係雪藏貨，就算厨師幾叻，都應該無可能好食過我D新鮮龍蝦。
有D人堅持食牛扒，飲紅酒，海鮮就要配白酒（其實唔一定），海陸大餐。。。就唯有兩個都唔揀，飲啤酒。
Comments