又係馬友

今次終於買到海（野生）馬友。留意條側鰭，黑色㗎，如果養嘅，應該係黃色㗎。（我查Google，網上係咁教。）

其實都唔係真係好罕有，可能因爲過左休漁期，呢個月次次都見到有。通常一堆養馬友擺响當眼處，大概4蚊兩上下，然後有2、3條會放入面D，無標價，因爲海馬友通常都要大概7蚊兩（雖然我試過去平D嘅街市，細小小，試過5個半），可能怕嚇親人（其實今時今日物價，7蚊兩都唔到嚇死人水平）。

而且，唔知道係營銷策略，定真係貴魚唔入好多，養魚可能一堆成十幾廿條，而海馬友通常只有2、3條。或者，等你以爲好少貨，策略之嘛，賣完即刻雪櫃攞多兩條出黎賣。

但事實上，呢個策略真係有效，我果日買左呢條魚後，第二條即刻有個識貨師奶買埋，我真係有D覺得好彩，如果遲一步，真係賣曬。人嘅心理就係咁。

一貫懶人煮法，叫賣魚婆唔好打鱗，成條魚返黎洗乾净，咩野調味都唔使，入蒸爐蒸熟，攤涼，食嘅時候劏開兩邊就得，我個人食得淡，豉油都唔使，如果習慣重口味D，點少少豉油就得。

本身馬友油脂重，好鮮甜，不過如果係養，D魚油總係有D artificial嘅感覺，可能始終食飼料大，當然都可能純心理作用，唔知。海馬友，D油香就好自然，作爲平日住家飯一舊水樓下之選，絕對排頭幾位。

另一個可以顯示條海馬友有幾好食，就係可以睇下我屋企幾個食評家嘅反應。之前，新鮮三文魚切舊煮比佢地食，都唔吼，今次，一切開，就立即跳上枱，兩個女食左我最少1/5條魚。。。

順便都講下，如果可以，帶個兜去買魚，一來環保，慳返個膠袋，好緊要，二來方便處理，返黎如果唔得閑即刻處理，成盒擺入雪櫃，唔驚整污糟。不妨考慮下。